– Төрт жылдың ішінде сіздерге 3 мың адам, оның ішінде 1800 оқытушы, 12 Ұлттық ғылым академиясының академигі, 10 Мемлекеттік сыйлықтың лауреаты, 9 бұрынғы министр, 7 бұрынғы Сенат депутаты, әлемдегі ең үздік университеттерден келген 400-ден астам белгілі профессорлар дәріс берді. Сіздер – бақытты жастарсыздар. Университет дипломымен қоса, «Астана» атты өмірлік университеттің тәлімін де алдыңыздар. Сіздер оқыған тұста елордамызда тарихи сәттер көп болды. Соның бірі – ЭКСПО халықаралық көрмесі. Сіздерді диплом алу салтанатымен шын жүректен құттықтаймын! – деді университет ректоры Ерлан Сыдықов.
Ректордың айтуынша, университет өзінің 21 жылдық тарихында 50 мың түлек әзірледі. Салтанатты жиында ректор 50 мыңыншы дипломның иесін атады. 50 мыңыншы түлек – Еуразия ұлттық университетінің журналистика факультетін тәмамдаған Бекарыстан Аманжолов есімді түлек болып шықты. Ол − былтырғы «Үздік спикер» республикалық байқауының жеңімпазы және халықаралық пікірталас турнирінде топ жарған талантты студенттердің бірі. Б.Аманжолов университет ұстаздарының үдесінен шығуға, ел дамуына үлес қосуға уәде берді.
Аталған шараға Ақмола облысының әкімі Мәлік Мырзалин, Халық қаһарманы Талғат Мұсабаев, академиктер Болат Көмеков, Рахметқажы Берсімбай, Ғарифолла Есім, Елтаңба авторы Жандарбек Мәлібеков және басқа да белгілі тұлғалар қатысып, түлектерге ақ жол тіледі.
Думан Анаш,
"Егемен Қазақстан"